ಪದಾರ್ಥಚಿಂತೆ

ಪದದರ್ಥಚಿಂತನೆಗಳೆಂದು ಬೊಬ್ಬಿಡುತಿಹರು
ಪದನಿಲ್ಲದಲೆ ನೂರ ಗಳಹುತಿಹರು
ಪದದ ಪದನರಸುತಲಿ ಬೇರ ತಡಕುತಲಿರಲು
ಗದಗುಟ್ಟಿ ಹೋಗುವರು ಚಾರುವಾಕ

ಕೇಶವನೆ ಗುರಿ

ನೀರಿಗಾಕರ ನೂರು ಪಾತ್ರಗಳು ಹಲವಾರು
ಭೋರಿಡುವ ಸಾಗರವದೊಂದೆ ಗಮ್ಯ
ನೂರು ದೈವದ ನಮನ ಸೇರುವುದು ಕೇಶವನ
ಸಾರುವುದು ಋಷಿವಾಣಿ ಚಾರುವಾಕ

ಅಸ್ತಮಿಪ ಸೂರ್ಯ...

ಶಸ್ತ್ರದೊಳೊ ಶಾಸ್ತ್ರದೊಳೊ ಕಾಷಾಯವಸ್ತ್ರದೊಳೊ
ವಿಸ್ತರದ ಸಾಮ್ರಾಜ್ಯ ರಾಜಕಾರ್ಯದೊಳೋ
ಎತ್ತರವು ಶಾಶ್ವತವೆ ಮುಳುಗೇಳುತಿಹ ಬದುಕಿ
ದಸ್ತಮಿಪ ಸೂರ್ಯನೊಲು ಚಾರುವಾಕ

ನೂರು ತೀವಿತ್ತು...

ಕಿರಿಯೊಳೊಂದಿಪ್ಪತ್ತು ಹರೆಯೊಳಿನ್ನಿಪ್ಪತ್ತು
ಹರಿದುದಿಪ್ಪತ್ತು ನೆರೆ ಕಿರಿಕಿರಿಗಳೊಳ್
ಜರೆಯೊಳಿಪ್ಪತ್ತು ನರೆ-ಮರೆವಿನೊಳಗಿಪ್ಪತ್ತು
ಸರಿದುದಲ್ಲಿಗೆ ನೂರು ಚಾರುವಾಕ

ದ್ವಾ ಸುಪರ್ಣಾ

ಪಕ್ಷಿಯುಗಳವದೊಂದು ಮರನನಾಶ್ರಯಿಸಿಹುದು
ಭಕ್ಷಿಸುವುದೊಂದು ಪಿಕ ಫಲದಿನಿಗಳ
ಈಕ್ಷಿಸುವುದಾದರದೊಳಿನ್ನೊಂದು ಕಾಣಿದುವೆ
ಲಕ್ಷ್ಯ ಜೀವಕು ಪರಕು ಚಾರುವಾಕ

ಅದ್ವೈತ ದರ್ಶನ

ಸ್ಪರ್ಷಗಳ ಗಂಧಗಳ ರಸ ರೂಪ ನಾದಗಳ
ಹರ್ಷ ದುಃಖಾದ್ಯಖಿಳ ಭಾವದ ಉಪಾಧಿಗಳ
ದರ್ಶನಾರೋಧಗಳ ತೊಡೆಯಲುಳಿಯುವ ನಿಜದ
ದರ್ಶನವೆ ಅದ್ವೈತ ಚಾರುವಾಕ

ಭೇದಾಭೇದ

ಭೇದವೆಂಬರು ಕೆಲರಭೇದವೆಂಬರು ಹಲರು
ಭೇದದಿನಭೇದವೆಂಬುವರಿತರರು
ಭೇದದೊಳ್ ಬಾಧಿಸುವ ವಾದದೊಳ್ ಭೇದಿಸುವ
ಭೇದಮೂರುತಿ ಯಾರೊ ಚಾರುವಾಕ

ದ್ವೈತಭಾವ

ಎರಡಿದ್ದುದೊಂದಾಯ್ತೊ ಒಂದರಿಂದೆರಡಾಯ್ತೊ
ಎರಡ ಮಾಯೆಯ ಕಳೆಯಲುಳಿವುದೊಂದೋ
ಹೊರಟ ಬಿಂದುವ ಸುತ್ತಿ ಮತ್ತೆ ಸೇರುವ ಗೆರೆಗೆ
ಎರಡು ಬಿಂದುವೊ ಒಂದೊ ಚಾರುವಾಕ

ಒನ್ನೋಟ

ಮೇರುವನು ಎತ್ತರದಿ ನೋಡಿದವನೋರ್ವ ಅದ
ನೇರಿದವ ಮತ್ತೋರ್ವ ಸುತ್ತಿಸುತ್ತಿ
ಓರುವನ ನೋಟ ಮತ್ತೋರುವನಿಗಿಲ್ಲ ಅವು
ಸೇರಿದೊಡೆ ಒನ್ನೋಟ ಚಾರುವಾಕ

ಅರಿವೆ ಗುರು...

ಚಾರು ವರ್ಣದ ಗಿಳಿಗೆ ಮೂರು ನುಡಿಗಲಿಸಿದವ
ರಾರು ಪೇಳೀ ಕಮಲಜಾಂಡದೊಳಗೆ
ಬಾರಿಬಾರಿಗು ನಿನ್ನನೆಳ್ಚರಿಸಿ ನಡೆಸುತಿಹ
ಕಾರುಣಿಕನರಿವೆ ಗುರು ಚಾರುವಾಕ